Samsung បានបើកឲ្យធ្វើការកុម៉្មង់ Galaxy S20 Series ទុកមុនហើយ!

ប្រិយមិត្ត ដែលនិយមតាមដានព័ត៌មានពាក់ព័ន្ធនឹងផលិតផលរបស់ Samsung នោះ ប្រាកដជាបានជ្រាបពីលក្ខណៈសម្បតិ្តខ្លះៗ ក៏ដូចជាដំណឹងពិសេសជាច្រើន  ទាក់ទងជាមួយកំពូលស្មាតហ្វូនជំនាន់ថ្មី ដែលស្ថិតក្នុងខ្សែស្រឡាយ Galaxy ត្រកូល S ត្រៀមនឹងបង្ហាញមុខ ក្នុងរយៈពេលដ៏ខ្លីខាងមុខនេះ។ ជាងនេះទៀត យើងថែមទាំងបានដឹងថា សម្រាប់ស្មាតហ្វូន Galaxy ត្រកូល S ក្នុងឆ្នាំ 2020 នេះ មិនមែនមានតែ 2 ម៉ូឌែលដូចរាល់ដងនោះទេ ដោយ Samsung នឹងធ្វើការដាក់បង្ហាញវាដល់ទៅ 3 ម៉ូឌែល រួមមាន Galaxy S20, S20+ និង S20 Ultra។


ខណៈពេលវេលាដែល Galaxy S20 Series ត្រៀមនឹងឃើញពន្លឺថ្ងៃ ក៏ខិតជិតមកដល់នោះ ស្រាប់តែឥឡូវ ក្រុមហ៊ុន Samsung បានអនុញ្ញាតឲ្យអតិថិជន ធ្វើការចុះឈ្មោះទុកមុន តាមរយៈគេហទំព័ររបស់ពួកគេផ្ទាល់ ដើម្បីទទួលបានដំណឹងភ្លាមៗ នៅពេលដែលក្រុមហ៊ុនខាងលើនេះ ចាប់ផ្តើមបើកឲ្យធ្វើការកុម៉្មង់ទុកមុន នូវកំពូលស្មាតហ្វូន Galaxy S20 Series ជំនាន់ថ្មី (សម្រាប់ក្រៅប្រទេស ) ។ រឹតតែពិសេស គឺថាសម្រាប់អ្នកដែលធ្វើការកុំម្ម៉ង់ទិញ Galaxy S20 Series ទុកមុន អាចនឹងទទួលបានកាស Galaxy Buds+ ជំនាន់ថ្មី ដោយឥតគិតថ្លៃទៀតផង។ យ៉ាងណា វាក៏ត្រូវបានគេបញ្ជាក់ថា នឹងបញ្ចេញលក់ជាផ្លូវការ នៅលើទីផ្សារសកល ចាប់ពីថ្ងៃទី 6 ខែមិនាទៅ បន្ទាប់ពីប្រកាសចេញបាន 3 សប្តាហ៍ ដូចរាល់ដងអញ្ចឹងដែរ។ លើសពីនេះ ទាំង 3 ម៉ូឌែលខាងលើ ក៏ត្រូវបានគេរំពឹងទុកថា នឹងមានមកជាមួយជម្រើសប្រព័ន្ធ 5G ផងដែរ។ រីឯតម្លៃវិញ Samsung នឹងដាក់លក់ស្មាតហ្វូនស៊េរីក្រោយនេះ ចាប់ពីខ្ទង់ 4 លានរៀល ( 1,000 ដុល្លារ ) ឡើងរហូតដល់ខ្ពស់បំផុតខ្ទង់ 5 លាន 2 សែនរៀល  ( 1,300 ដុល្លារ )។

គួរបញ្ជាក់ផងថា Samsung នឹងធ្វើការប្រកាសចេញ Galaxy S20, Galaxy S20+ និង Galaxy S20 Ultra ក្នុងព្រឹតិ្តការណ៍ Samsung Unpacked ដែលធ្វើឡើងនៅថ្ងៃទី 11 ខែកុម្ភៈ ឆ្នាំ 2020 ខាងមុខនេះ។ មិនតែប៉ុណ្ណោះ ក្នុងនោះ ស្មាតហ្វូនអេក្រង់បត់ ជំនាន់ក្រោយ និងផលិតផលថ្មីៗ ជាច្រើនទៀតរបស់ Samsung ក៏អាចនឹងបង្ហាញវត្តមាន ក្នុងព្រឹតិ្តការណ៍នោះដែរ។ ដូច្នេះ មិនយូរទៀតនោះទេ យើងនឹងបានភ្លឺភ្នែកទាំងអស់គ្នា ជាមួយបច្ចេកវិទ្យាថ្មីទំនើបៗ របស់ក្រុមហ៊ុនអេឡិចត្រូនិចយក្ស នៃកូរ៉េខាងត្បូងនេះ ជាក់ជាពុំខាន។